आज विश्वकर्मा पुजा मनाईदै

by raju Fri Sep 17, 2010 4:01 pm NST

आज असोज महिनाको पहिलो दिन । यातायात तथा कारखानामा कार्यरत मजदुरले मेसिनरी औजारको पूजा गरेर विश्वकर्मा पूजा मनाउँदैछन् । विश्वकर्मा पूजामा वर्षभरि कुनै अपि्रय घटना नहोस् भनेर मेसिनको पूजा गर्ने चलन छ । काठमाडौंलगायत मुलुकका विभिन्न भागका उद्योग र कारखानामा आज मजदुरले ध्वजा सजाएर उत्साहपूर्वक विश्वकर्माको पूजा गरिरहेका छन् । आज औद्योगिक क्षेत्रमा काम गर्ने मजदुरलाई बिदा दिने चलन छ । उद्योगी र श्रमिकबीचको आपसी सम्वन्ध बलियो पार्न यो दिनलाई महत्वपूर्ण अवसरका रुपमा लिइन्छ । श्रमिकले श्रमका देवताका रुपमा विश्वकर्माको पूजा गर्छन् । आफ्ना काम गर्ने औजार उपकरण र यातायातका साधनको पूजा नै यो दिनको विशेषता हो । पौराणिक कथा अनुसार विश्वकर्मालाई वास्तुका छोरा मानिन्छ । पौराणिक युगका सबै राजधानी बाबा विश्वकर्माले निर्माण गरेको जनविश्वास छ । सत्य युगको स्वर्गलोक त्रेता युगको लंका द्वापर युगको द्वारिका सबैमा विश्वकर्माको कला पोतिएको धार्मिक मान्यता छ । यही विश्वासमा अहिले पनि धनधान्य र सुख समृद्धिको चाहना राख्नेहरुले विश्वकर्माको पूजा गर्छन् ।