अन्तर्राष्ट्रिय दातृनिकायसँग प्रधानमन्त्रीको आग्रह

by raju Thu Feb 21, 2008 3:04 pm NST

प्रधानमन्त्री गिरिजाप्रसाद कोइरालाले नेपालको शान्ति स्थापना र विकासमा सहयोग गर्न अन्तर्राष्ट्रिय दातृनिकायसँग आग्रह गर्नुभएको छ । आजदेखि काठमाडौमा सुरु भएको दातृ निकायसँगको परामर्श बैठकलाई सम्बोधन गर्दै प्रधानमन्त्री कोईरालाले नेपाल यतिबेला परिवर्तनको संघारमा भएकोले अब हुने संविधानसभा चुनावले देशका बाँकी समस्या सम्बोधन गर्ने बताउनु भयो ।

उहाँले अब कुनैपनि हालतमा चुनाव नसर्ने भन्दै तोकिएकै मितिमा चुनाव गर्ने प्रतिबद्धता ब्यक्त गर्नुभयो । प्रधानमन्त्री कोइरालाले दातृनिकायका प्रतिनिधिलाई चुनाव पछि नेपालमा शान्ति स्थापना हुने र विकास निर्माणका कामले गति लिने भन्दै आश्वस्त पार्नु भयो । उहाले नेपालमा जारी द्धन्दले भौतिक पुर्वाधार ध्वस्त भएको भन्दै सरकार सिमित स्रोत र साधनकाबीच ध्वस्त संरचनाको पुनर्निर्माणमा जुटेको बताउनु भयो । उहाँले यसका लागि नेपालले अन्तर्राष्ट्रिय समुदायबाट सहयोगको अपेक्षा गरेको बताउनु भयो । दीर्घकालीन विकास योजनाका निर्माणकालागि दातृ निकायको सहयोग अनिवार्य भएको भन्दै कोइरालाले दातासँगको प्रत्यक्ष संवादबाट नेपालले भोगेका चुनौतीका विषयमा साझा अवधारणा बनाउन सहयोग पुग्ने बताउनु भयो । कार्यक्रमपछि संचारकर्मीको जिज्ञासामा प्रधानमन्त्री कोईरालाले तराईमा जारी हिसां चाडै समाधान हुने बताउनुभयॊ ।

कार्यक्रममा एशियाली विकास बैकका उपाध्यक्ष लियन झिनले विकास र सम्बृद्धिकालागि शान्ति आवश्यक भएको बताउनुभयो । बैठकमा अर्थमन्त्री रामशरण महतले तीन बर्षे अन्तरिम विकास योजनाका बिषयमा दाताहरुलाई जानकारी गराउनु भएको थियो । बैठक भोलिसम्म चल्ने छ ।