मोर्चाकॊ वार्तामा मन्त्रीहरुकॊ आपत्ति

by raju Thu Feb 21, 2008 3:03 pm NST

तराईमा आन्दोलनरत मधेसी नेताहरुले हिजो भारतीय राजदूतसँग भेटेकॊ बिषयमा मन्त्रीहरुले आपत्ति जनाएका छन् । मन्त्रीपरिषद्को आजको बैठकमा मन्त्रीहरुले मधेसी नेताहरुले सात दलकै वार्ता टोलीसँग वार्ता गर्नुपर्ने भन्दै भारतीय राजदूतसंग भेटेकोप्रति आपत्ति जनाएका छन् । यसअघि तराईमा अनिश्चितकालीन आमहड्ताल गरिरहेको संयुक्त लोकतान्त्रिक मधेसी मोर्चाका नेताहरुले हिजो भारतीय राजदूतसँग छलफल गरेका थिए ।

प्रधानमन्त्रीसँग वार्ता हुने चर्चा चलिरहेका बेला मोर्चाले बुद्धिजीवी मानवअधिकारवादी र नागरिक समाजसँग छलफल गरेको र त्यसक्रममै भारतीय राजदूत शिवशंकर मुखर्जीसँग छलफल गरेको बताएको छ । तराई-मधेस लोकतान्त्रिक पार्टीका नेता हृदयेश त्रिपाठीले राजदूतसँग छलफल भएको पुष्टि गर्दै प्रधानमन्त्रीसँग भने हिजो वार्ता नभएको बताउनुभयो ।

आन्दोलन र संविधानसभा चुनावका विषयमा मोर्चामा संलग्न तराई मधेश लोकतान्त्रिक पार्टी मधेशी जनअधिकार फोरम र सद्भावना पार्टीबीच गम्भीर छलफल भएको बताइएको छ । प्रधानमन्त्रीसँगको वार्तामा कसरी बस्ने र आफ्ना ६ बुँदे मागका विषयमा के-कस्तो अडान राख्ने भन्ने विषयमै छलफल भइरहेको मोर्चाले जनाएको छ ।