तराईमा तनाव: दैनिक उपभोगका सामाग्री र औषधी समेतको अभाव

by raju Thu Feb 21, 2008 2:59 pm NST

नौ दिनदेखि जारी आमहडतालका कारण कष्टकर बनेको तराईको जनजीवन अझै सामान्य हुनसकेको छैन । स्थानीय प्रशासनले स्थिति नियन्त्रणमा लिन बिहानैदेखि ठाउँठाउँमा कफ्र्यु आदेश जारी गरेको छ ।

आज सुनसरीमा विहानैदेखि प्रहरी र प्रदर्शनकारीबीच झडप भएको छ । प्रहरीले प्रदर्शनकारीमाथी गोली प्रहार समेत गरेको छ । सुनसरीको भण्टावारीमा प्रहरीको गोली लागेर प्रदर्शनकारी लालु कामत गम्भीर घाईते भएका छन् । आज बिहान ६ बजे प्रहरीले पश्चिमबाट यातायात स्कर्टिङ गर्ने क्रममा आन्दोलनकारीले अवरोध गरेकाले हवाइ फायर गरेकेा प्रहरीले जनाएको छ । तर आन्दोलनकारीहरुले भने आफुहरुलाई नै लक्षित गरी प्रहरीले गोली चलाएको दावी गरेका छन् ।

आन्दोलनकरीको ढुंगा प्रहारबाट ५ जना घाइते भएका छन् । आन्दोलनकारीले सातवटा यातायातका साधन तोडफोड गरेका छन् । आन्दोलनकारीको ढुंगा प्रहारबाट ना ३ ख ५५५० नम्बरको बसका चालक सन्तोष भण्डारी र यात्रु रामचन्द्र फुँयालसहित पाँचजना घाइते भएको हाम्रा स्थानीय सहकर्मीले जनाएका छन् । राजमार्ग क्षेत्रमा झडप हुन थालेपछि प्रशासनले इटहरीदेखि कोशी ब्यारेजसम्मको महेन्द्र राजमार्ग क्षेत्रमा कफ्र्यु लगाउने निर्णय गरेको छ । आज राती ९ बजेदेखि भोलि विहान ७ बजेसम्म महेन्द्र राजमार्गको एक किलोमिटर आसपासको क्षेत्रसम्म कफ्र्यु लगाउने निर्णय गरेकेा प्रमुख जिल्ला अधिकारी प्रेम नारायण श्रेष्ठले जानकारी दिनुभयो । स्थितीमा सुधार नआएसम्म कफ्र्यु हरेक दिन राती ९ बजेदेखि भोलिपल्ट विहान ७ बजेसम्म लगाउने पनि उहाँले बताउनुभयो ।

त्यसैगरी सिरहाको लहान र सिरहा नगरपालिकामा पनि अनिश्चितकालीन कफर्यु जारी छ । कफ्र्युको उल्लंघन गर्दै सिरहामा मारिएका राजेश ठाकुरको शवयात्रा भएको छ । कफ्र्यु उल्लंघनका क्रममा प्रहरीले गरेको हवाइ फायरमा एकजना घाइते भएका छन् । सप्तरीमा पनि बन्दका कारण जनजीवन कष्टकर बनेकेा छ । अत्यावश्यक सामाग्रीको अभाव भएको छ । लगातारको बन्द र कफ्र्युका कारण नेपालगन्जमा दैनिक उपभोगका सामाग्री र औषधी समेतको अभाब देखिएको छ । उता संयुक्त थारु राष्ट्रिय मोर्चाले थरुहट क्षेत्रमा बन्द गरेको अनिश्चितकालीन बन्द दुई दिनका लागि फिर्ता लिएको छ । सर्वसाधारणले भोग्नुपरेको कष्टलाई मध्यनजर गरी बन्द फिर्ता गरिएको मोर्चाका अध्यक्ष लक्ष्मण थारुले विज्ञप्तिमार्फत जनाएको छ ।

यसैबीच नौ दिनदेखिको बन्दले जनजीवन आक्रान्त बनेपछि आज बिहानै विराटनगरमा सद्भाव ‍र् याली निकालिएको छ । विराटनगरको जनआन्दोलन चोक र भृकुटी चोकबाट निस्किएको दुइवटा र् यालीमा ब्यापक जनसहभागिता रहेको हाम्रा स्थानीय सहकर्मीले जनाएका छन् । बन्द पीडितहरुको सकि्रयतामा निकालीएको र् यालीले सामाजिक सद्भाव कायम गर्न आग्रह गरेका थिए । र् यालीका सहभागीहरुले हिमाल पहाड तराइ एक हौ भन्दै नारा लगाएका थिए । लामो बन्दले मजदुरहरुको जीवन अत्यन्तै कष्टकर भएकोले बन्द फिर्ता लिन उनीहरुले माग गरेका थिए ।