तराईमा अझ तनाव कायमै

by raju Wed Feb 20, 2008 3:17 pm NST

आठ दिनदेखि जारी आम हडतालका कारण कष्टकर बनेको तराईको जनजीवन अझै सामान्य हुनसकेको छैन । स्थानीय प्रशासनले आज पनि स्थिति नियन्त्रणमा लिन बिहानैदेखि ठाउँठाउँमा कर्फ्यू आदेश जारी गरेको छ । स्थानीय प्रशासनले बाराको परवानीफरदेखि सिमराको सूर्य नेपाल प्रालिसम्मको एक किलोमिटर आसपासका क्षेत्रमा बिहान ७ बजेदेखि अर्को आदेश नभएसम्म कर्फ्यू आदेश जारी गरेको छ ।

त्यसैगरी स्थानीय प्रशासनले बीरगन्ज उपमहानगरपालिका र आसपासका क्षेत्रमा पनि बिहान ७ बजेदेखि अनिश्चितकालिन र्कफ्यू आदेश जारी गरेको छ । प्रहरीको गोलीबाट बीरगन्ज छपकैयाकी हसिना खातुन घाइते भएपछि नारायणी उपक्षेत्रीय अस्पतालमा उपचार भइरहेको छ । कर्फ्यू अवज्ञा गदै बन्द आव्हानकर्ताले बीरगन्जको प्रतिमा चोक मुर्लीचोक नगवा र नयाँ बसपार्कमा प्रदर्शन गरिरहेका छन् । प्रहरीले बाईपास सडकमा आन्दोलनकारीले राखेको अवरोध हटाउने क्रममा स्थिति नियन्त्रणमा लिन ५ राउण्ड हवाई फायर गरेको थियो । मुर्लीमा प्रर्दशनकारीहरुलाई तितरवितर पार्न प्रहरीले तीन राउण्ड हवाई फायर गरेको थियो । तेलका ट्यांकरहरु संचालनका लागि कर्फ्यू जारी गरिएको बताईएको छ । आज बीरगन्जबाट एक सय एघार ट्यांकरलाई स्कटिङ्ग गरिने योजना रहेको जिल्ला प्रशासन कार्यालय पर्साले जनाएको छ ।

यसैबीच पेट्रोलियम पदार्थ लिन बाराको पथलैयाबाट रक्सौलतर्फ ९० वटा खाली ट्यांकर पठाइएको छ । त्यसैगरी सिरहाको लहान र सिरहा नगरपालिकामा पनि विहान ७ बजेदेखि अनिश्चितकालीन कर्फ्यू आदेश जारी गरिएको छ । विराटनगरमा हिजो बिहान ११ बजेदेखि लगाइएको अनिश्चितकालीन कर्फ्यू आज बिहान १० बजेपछि खुलाइएको छ ।

नेपालगाजमा पनि कर्फ्यू कायमै छ । आज बिहान प्रर्दशनकारीहरुले नेपाल भारत सीमाबर्ती क्षेत्रमा पर्ने जमुनाहा र जयसपुर क्षेत्रमा कर्फ्यूको अबज्ञा गर्दै प्रर्दशन गरेका छन । प्रर्दशनकारीलाई नियन्त्रणमा लिने क्रममा प्रहरीले लाठी चार्ज गरेको छ । प्रर्दशनकारीहरुको बिचबाटै कटुवा पेस्तोलबाट फायरिङ भएको दाबी प्रहरीले गरेको छ । प्रर्दशनकारी र प्रहरी बिच भएको झडपमा एक स्थानिय महिला वाइपा सायरा कुरैसी घाईते भएको प्रहरीले जनाएको छ । उनको स्थानिय शिक्षण अस्पतामा उपचार भईरहेको हाम्रा स्थानीय सहकर्मीले जनाएका छन् ।

यसै गरी संयुक्त मधेशी मोर्चाले आव्हान गरेको बन्दका क्रममा आईतबार मृत्यु भएका नेपालगन्ज नगरपालिका वडा नं १६ का गुलजार खा को शब स्थानिय प्रशासनले परिवारजनलाई बुझाएको छ । प्रशासनले तत्काल राहत स्वरुप १० हजार रुपैयाँ पनि उलपब्ध गराएको छ । खाँको परिवारजनका लागि १० लाख रुपैयाँ उपलब्ध गराउन पनि स्थानिय प्रशासनले गृहमन्त्रालय समक्ष सिफारिस गरेपछि खाँको परिवारले शव बुझेका हुन ।

लिम्बुबान राज्यको माग गर्दै लिम्बुवान राज्यपरिषद्ले कोशीपूर्वमा गरेकेा बन्दको विरोधमा ताप्लेजुङमा विद्यार्थीहरुले प्रदर्शन गरेका छन् । लिम्बुवान क्षेत्र बन्दका कारण ताप्लेजुङमा ग्यास चामललगायत दैनिक उपभोग्य सामानको अभाव भएको छ । यसैबीच खुम्वुवान राष्ट्रिय मोर्चा थारुवान राष्ट्रिय मोर्चा र दलित जनजाति पार्टीले आज आव्हान गरेको उदयपुर बन्दको आठदल निकट विद्यार्थी संगठनले अवज्ञा गरेका छन् । बन्दको अवज्ञा गदै विद्यार्थीले सदरमुकाम गाईघाट बजारमा बिहानैदेखि प्रर्दशन समेत गरेका थिए । उनीहरुले बजार बन्द विरुद्ध प्रर्दशन गर्दै व्यापारी उद्योगी यातायात व्यवसायीलाई बन्द अवज्ञा गर्न अनुरोध गरेपछि बजार तथा पसल खुलेका छन् । बन्द अवज्ञापछि आन्तरिक यातायात समेत संचालनमा आएका छन् । विद्यार्थी संगठनले सबैखाले बन्दको अवज्ञा गर्दै संविधानसभा चुनाव सफल बनाउने घोषणा समेत गरेका छन् । बन्द खुलाउन स्थानीय प्रशासन र बिद्यार्थीहरुले पहल गरेपछि मध्यान्हपछि सबै बजार पसल खुलेको त्रियुगा उद्योग बाणिज्य संघका महासचिव गोपाल श्रेष्ठले बताउनु भयो । विद्यार्थीको अवज्ञासँगै जिल्लाका मुख्य बजार कटारी बेल्टारलगायत अन्य ग्रामीण बजार खुलेको जिल्ला प्रहरी कार्यालयका प्रहरी नायव उपरिक्षक मोहनबहादुर खड्काले बताउनु भयो । जिल्ला भित्र यातायातका साधन पनि चल्न थालेको छ तर जिल्ला बाहिर जाने यातायातका साधन भने सुचारु हुन सकेको छैन ।

बन्दकै कारण जिल्लामा खाद्यान्न पेट्रोलियम पदार्थको अभाव भएको छ । पॆट्रोलियम पर्दाथको अभावमा जिल्लामा संचालित तीनवटा एम्वुलेन्स समेत दुई दिन देखि बन्द भएको हाम्रा स्थानीय सहकर्मीले जनाएका छन् ।