आदिवासी जनजातिले छुट्टै संयन्त्रको माग गर्दै रिट दायर

by rn Sun Feb 15, 2009 3:56 pm NST

आदिवासी जनजातिले संविधानसभामा आदिवासी जनजातिका सवाललाई स्वतन्त्र रुपले उठाउन छुट्टै संयन्त्रको माग गरेका छन् । राष्ट्रिय आदिवासी जनजाति महिला महासंघलगायत २० वटा आदिवासी जनजाति संस्थाहरुले संविधानसभामा आदिवासी जनजाति सभासद्को भूमिका शून्य रहेको भन्दै छुट्टै संयन्त्रको माग गरेका हुन् । उनीहरुले काठमाडौंमा आज पत्रकार सम्मेलन गरी सरकारले पारित गरिसकेको आईएलओ महासन्धि १६९ मा ब्यवस्था भएका अधिकार कार्यन्वयन गर्न माग गरे । उनीहरुले आईएलओ महासन्धि पूर्ण कार्यान्वयनको माग गर्दै गत फागुन १ गते सर्वोच्च अदालतमा रिट दायर गरेको जानकारी पनि दिएका छन् । पत्रकार सम्मेलनमा आदिवासी जनजातिका मानवअधिकार संरक्षणको क्षेत्रमा कार्यरत कानुनब्यवसायीको संस्था लाहुर्निपका उपाध्यक्ष दिनेश घलेले जातीय अधिकार संरक्षण गर्न आदिवासी जनजाति सभासद्को भूमिका शून्य रहेका भन्दै आक्रोस पोख्नुभयो । राष्ट्रिय आदिवासी जनजाति महिला महासंघका अध्यक्ष चिनीमाया माझीले नयाँ संविधानमा कुल जनसंख्याको ३८ प्रतिशत हिस्सा ओगट्ने आदिवासी जनजातिका सवाल समेट्न माग गर्नुभयो ।