प्रजातन्त्र दिवसको चहलपहल

by raju Tue Feb 19, 2008 3:53 pm NST

आज फागुन ७ गते, अर्थात अन्ठाउन्नौं राष्ट्रिय प्रजातन्त्र दिवस । राणाशासन अन्त्य भई प्रजातन्त्र उदय भएको सम्झनामा प्रत्येक वर्ष फागुन ७ गते प्रजातन्त्र दिवस मनाउने गरिन्छ ।

यसैबीच प्रधानमन्त्री गिरिजाप्रसाद कोइरालाले प्रजातन्त्र दिवसको अवसरमा आज शुभकामना सन्देश जारी गरी सबै समस्या राष्ट्रिय एकता र सहमतिको आधारमा उचित तवरले समाधान गरी मुलुकलाई निर्वाध रुपले अघि बढाउन संवेदनशील भएर लाग्न सबैमा अपील गर्नुभएको छ । सन्देशमा प्रधानमन्त्री कोइरालाले अगामी चैत २८ गते संविधानसभा चुनाव सम्पन्न गराउन दृढ संकल्पका साथ लागिरहेको स्मरण गराउँदै यसलाई सफतापूर्वक सम्पन्न गर्नु हामी सबैको पहिलो जिम्मेवारी भएको बताउनुभएको छ । सन्देशमा प्रधानमन्त्री कोइरालाले संविधानसभाको सफलताले मात्र लोकतन्त्रलाई संस्थागत रुपले अघि बढाएर देशमा दीगो शान्ति कायम गर्ने र सबै जातजाति वर्ग र क्षेत्रका जनतालाई समान रुपमा सम्पूर्ण अधिकारको न्यायोचित उपभोग गर्ने अवसर प्रदान गर्ने बताउनुभएको छ ।

त्यसैगरी नेपाली कांग्रेस नेकपा एमालेलगायतका दलहरुले पनि प्रजातन्त्र दिवसको उपलक्ष्यमा शुभकामना ब्यक्त गरेका छन् । यसैबीच राजा ज्ञानेन्द्रले पनि अन्ठाउन्नौं राष्ट्रिय प्रजातन्त्र दिवसको उपलक्ष्यमा शुभकामना सन्देश जारी गरेका छन् । सन्देशमा राजा ज्ञानेन्द्रले स्वार्गीय राजा त्रिभुवन र वीर शहिदप्रति श्रद्धाञ्जली अर्पण गरेका छन । राजा ज्ञानेन्द्रले आफ्नो सन्देशमा देशको अखण्डता राष्ट्रियता तथा स्वतन्त्रतालाई अक्षुण्ण राख्दै सदियौंदेखि नेपाली-नेपालीबीच रहिआएको सद्भावलाई सुदृढ तुल्याएर प्रजातन्त्रको प्रतिफल सबैले समानरुपमा पाउने वातावरणका साथै समुन्नत र सबल नेपाल बनाउन हामी सबैलाई सफलता मिलोस् भन्ने कामना गरेका छन् ।

यसरी नैं प्रजातन्त्र दिवसको अवसरमा भएको कार्यक्रममा प्रधानमन्त्री गिरिजाप्रसाद कोइरालाले सैनिकमाच टुंडिखेलमा सम्बोधन गर्नुभएको छ । कार्यक्रममा राष्ट्रप्रमुखका हैसियतले प्रधानमन्त्री कोइरालालाई नेपाली सेनाले सलामी अर्पण गरेको थियो ।