आज श्रीपंचमी पर्व- राष्ट्रपतिवाट बसन्तश्रवण

by rn Wed Jan 20, 2010 12:52 pm NST

आज श्रीपंचमी पर्व विद्याकी अधिष्ठात्री देवी सरस्वतीको पूज्ाा-आराधना गरी मनाइँदैछ । विद्याकी देवी सरस्वती सिर्जनाकी देवी भएकाले विशेषगरी साहित्यकार कलाकार पत्रकार शिक्षक र विद्यार्थी आ-आफ्ना कला-साधनाका वस्तु कलम कापी कुची र वाद्ययन्त्रलाई सरस्वतीका रुपमा पूजा गर्छन् । तान्त्रिकहरु तन्त्रसिद्धिका लागि तारादेवीका रुपमा आराधना गर्छन् । सूर्य उत्तरतिर लागी दिन लामो हुने र वसन्त ऋतु सुरु हुने विश्वासका साथ आजका दिनलाई 'वसन्त पाचमी' पनि भन्ने गरिन्छ ।

ऋग्वेदमा वाग्देवीका नामले प्रसिद्धि पाएकी ब्रह्माकी अर्धाङ्गिनी ब्रह्मायणीको पूजा उपासनाले ज्ञान सिद्धि र सद्बुद्धि प्राप्त हुने भएकाले सरस्वती पूजाको ठूलो महत्व छ । आज सरस्वतीको पूजा गरी विद्यारम्भ गरेमा सर्वसिद्धि प्राप्त हुन्छ भन्ने विश्वास छ । आज विवाह व्रतबन्ध गुफा राख्ने र बेलविवाह जस्ता सामाजिक तथा धार्मिक कार्य गर्न साइत हेर्नुपर्दैन । आज बालबालिकालाई शिक्षारम्भ गराउने र नाक-कान छेड्ने गरिन्छ ।

काठमाडौं उपत्यकाका स्वयम्भू मैतीदेवी र गैह्रीधारास्थित नीलसरस्वती, ललितपुरको लेलेलगायत विभिन्न जिल्लामा रहेका सरस्वतीका मन्दिरमा आज बिहानैदेखि पूजाआजा गर्न खासगरी छात्रछात्राको घुइँचो लागेको छ । सरस्वतीलाई चढाइएको सात गेडा अक्षता निलेमा विद्या र बुद्धि बढ्ने र चेतनाको ज्योति पाइन्छ भन्ने विश्वास छ ।

यसैबीच वसन्तपाचमीकै अवसरमा राष्ट्रपति डाक्टर रामवरण यादवले आज काठमाडौंको वसन्तपुरमा वसन्तश्रवण गर्नुभएको छ । वसन्तपुरको नासलचोकमा वसन्तश्रवणपछि राष्ट्रपति यादवले टीका तथा प्रसाद लगाउनुभयो । बसन्त श्रवणका लागि प्रधानमन्त्री सभामुख प्रधानसेनापतिलगायत नासलचोक जानुभएको थियो । कार्यक्रममा नेपाली सेनाले उहाँको सम्मानमा सलामी चढाएको थियो ।