भोलिदेखि तेलको आपूर्ति सहज हुने मन्त्री गुप्ताको दावी

by raju Wed Feb 13, 2008 3:38 pm NST

पेट्रोलियम पदार्थको हाहाकार भइरहेको बेला उद्योगवाणिज्य तथा आपूर्ति मन्त्री श्यामसुन्दर गुप्ताले भने भोलिदेखि तेलको आपूर्ति सहज हुने दावी गर्नु भएको छ । मन्त्री गुप्ताले सुरक्षाकर्मीको सहयोगवाट आज दिउँसो तीन वजेसम्म काठमाडौंमा २ सय २५ ट्याङकर तेल भित्रिने र भोलिदेखि नै सहज आपूर्ति हुने दावी गर्नुभयो ।

जुनसुकै स्थितिमा पनि तेलको सहज आपूर्ति गर्न उच्च सुरक्षा अधिकारी र गृहसचिवसंगको बैठकमा निर्णय भएको भन्दै मन्त्री गुप्ताले मधेशको आम हडतालले पनि तेलको आपूर्तिमा अवरोध नहुने दावी गर्नु भयो । भारतीय आयल निगमलाई ऋण तिर्न सरकारले नेपाल आयल निगमलाई एक अर्व ५ करोड रुपैयाँ दिएपछि भारतबाट तेल आयात समस्या नभएको उहाँको भनाइ छ ।

मधेश आन्दोलनले संविधानसभाको चुनाव नरोकिने पनि मन्त्रीले बताउनुभयो । मधेशमा आन्दोलन गरिरहेको पार्टीहरु चुनाव अघि नै वार्तामा आइसक्ने ठोकुवा पनि उहाँले गर्नु भयो । चुनाव अघि संविधान संशोधन गर्न नसकिने पनि मन्त्री गुप्ताले प्रष्ट पार्नु भयो । मधेशी पार्टीहरुले संविधान संशोधन गरि संविधानमै स्वायतत्ताको ग्यारेण्टी गर्नु पर्ने माग राखिरहेका छन ।