रौनक सिन्धुली महोत्सवको

by raju Fri Jan 18, 2008 7:42 am NST

महोत्सवको रौनकले सिन्धुली अहिले दुलही जस्तै देखिएको छ। सिन्धुलीका ऐतिहासिकस्थल र कृषि उत्पादनको प्रचार प्रसार गराइ जिल्लाको आर्थिक हैसियत उकास्ने उद्देश्यले महोत्सव आयोजना गरिएको बताइएको छ । सिन्धुली उद्योग वाणिज्य संघका अध्यक्ष तथा महोत्सव संयोजक मीनबहादुर श्रेष्ठले जिल्लामा आर्थिक विकासलाई गतिशील बनाउन महोत्सव गरिएको बताउनुभयो । सोमबारसम्म महोत्सवको १ लाख जना मानिसले अवलोकन गरेको सिन्धुली उद्योग वाणिज्य संघका सचिव अमरेशचन्द्र वैदारले जानकारी दिनुभएको छ ।

महोत्सवमा राखिएका १ सय २५ मध्ये १० वटा स्टलमा जुनार र सुन्तलामात्र राखिएका छन् । महोत्सवमा जडीबुटी गार्मेन्ट कृषिजन्य विद्युतीय सामग्री पनि राखिएका छन् । महोत्सवले उपभोक्ता र लघु उद्यमीबीच भेट गराएर उत्पादित वस्तुको बजार विस्तार गरेको छ । सिन्धुलीमा उत्पादन हुने जुनारको बजार विस्तार गर्न महोत्सव सफल छ । यहाँका ४६ गाविसमध्ये ४२ गाविसमा व्यवसायिकरुपमा जुनारखेती गरिन्छ । महोत्सवमा यहाँको चुरे पहाड र महाभारत लेकमा पाइने कुरिलो ठूलोओखती हड्चुर र पाखनबेतजस्ता जडीबुटीको पनि प्रदर्शन र बिक्री गरिएको छ ।

सिन्धुली मै पर्ने बीपी राजमार्ग पनि महोसवको आकर्षक गन्तव्य रहेको छ । बीपी राजमार्गका आसपासका क्षेत्र पीकनिक जाने थलो जस्तै बनेको छ । महोत्सवमा जनजातिका परम्परा र संस्कृति झल्किने वस्त्र बाजा र झाँकी पनि प्रदर्शन गरिएको छ । लोपोन्मुख जाति हायू र थामीका नाच र झाकीले सहभागीहरुकॊ ध्यानाकर्षण गरॆको छ । महोत्सवमा तामाङ मगर गुरुङ सुनुवार नेवार दनुवार र माझी समुदायका नाच प्रदर्शन गरिएको छ ।

त्यस्तै घरेलु स्थानीय तथा अन्य जिल्लाका लघु उद्यमीले तयार गरेको ढाका राडीपाखी खुकुरी हस्तकलाका सामग्रीको पनि प्रदर्शन गरिएको छ । भारतीय कम्पनीका गाडी ट्याक्टरका साथै विभिन्न इलेक्ट्रोनिक्स सामग्री छुटमा बिक्री गरिएको छ । महोत्सवका कारण सिन्धुलीका होटल र गेस्टहाउस र लज खचखच भरिएका छन् । नेपाल उद्योग वाणिज्य महासंघअन्तर्गतको सामाजिक सेवा समितिका अध्यक्ष लोकविक्रम थापाले गाउँगाउँमा हुने महोत्सव अर्थिक उन्नतीको संकेत भएको बताउनुभयो ।

ऐतिहासिक सिन्धुलीगढी र हरिहरपुरगढी अवलोकन गर्न आउनेको संख्या पनि बढेको छ । यहाँ दैनिक २ सय जनाले अवलोकन भ्रमण गरिरहेका छन् । महोत्सवमा सहभागी हुन राजनीतिक दलका नेता पनि सिन्धुली पुगेका छन् । सिन्धुलीको सामुदायिक वन पनि महोत्सवको अर्को आकर्षण बनेको छ । सिन्धुली उद्योग वाणिज्य संघको अगुवाइमा नेपाल उद्योग वाणिज्य महासंघ कमलामाई नगरपालिका सामुदायिक वन महासंघ सिन्धुली र जिल्ला विकास समिति सिन्धुलीले संयुक्तरुपमा महोत्सवको गरेका हुन । जिल्लास्थित पाँच राजनीतिक दलको समन्वयमा भएको यो महोत्सवले राजनीतिक द्वन्द्व अन्त्य भएको आभास मिलेको छ ।