वाईसीएल कार्यालयमा छापा

by raju Thu Feb 7, 2008 2:35 pm NST

नेकपा माओवादीको सहायक संगठन वाइसीएलले हिजो संगठनको कार्यालयमा प्रहरीले छापा मारेकोप्रति आपत्ति प्रकट गर्दै आज काठमाडौमा भण्डाफोर कार्यक्रम गरिरहेको छ । उपत्यकामा रहेका माओवादी भातृ संगठनका विभिन्न कार्यालयहरुमा प्रहरीले विना सूचना र विना पूर्जि छापा मारेको विरोध गर्दै वाइसीएल कार्यकर्ताहरु खुल्ला मंचमा भेला भएका छन् ।

उपत्यकाका विभिन्न ठाउँबाट नारा जुलुस सहित आएका वाइसीएल कार्यकर्ताहरु अहिले खुल्लामंचमा भेला भइरहेका छन् । गएराती प्रहरीले माओवादीको युवा संगठन वाईसीएलको बालाजुस्थित केन्द्रीय कार्यालय सहित उपत्यकाका तीनवटा कार्यालयमा छापा मारेका थिए ।

हतियार रहेको आशंकामा छापा मारेपनि हतियार भने नभेटिएको प्रहरीले जनाएको छ । गृह मन्त्रालयको आदेशमा प्रहरीले छापा मारेपछि काठमाडौं उपत्यकाको अवस्था केहीबेर तनावग्रस्त बनेको थियो । प्रहरीले काठमाडौंको वालाजु ललितपुरको खनाल गार्मेन्ट र भक्तपुरको गठ्ठाघरमा रहेको वाईसिएल कार्यालयमा एकैपटक छापा मारेको थियो ।