असोज १२ गते नेपाल बन्दको आव्हान

by dinesh Fri Sep 5, 2008 12:16 pm NST

संघीयताको विरोध गर्दै विभिन्न मागहरुका साथ राष्ट्रिय जनमोर्चाले असोज १२ गते आम हडताल र नेपाल बन्दको आव्हान गरेको छ । जनमोर्चा अध्यक्ष चित्रबहादुर केसीद्वारा हस्ताक्षरित प्रेस वक्तव्य अनुसार श्रावण २० देखि चरणवद्ध रुपमा आन्दोलनका कार्यक्रमहरु घोषणा गरिएका छन् । जस अन्तर्गत श्रावण २० गते देखि आन्दोलनको कार्यक्रम सुरु भएर अहिलेसम्म इलाकास्तरीय मसाल जुलुस देशव्यापी मसाल जुलुस जिल्लास्तरीय अन्तरक्रिया कार्यक्रम सम्पन्न भइसकेको बताइएको छ । त्यस्तै भाद्र २५ गते जिल्लामा प्रजिअ मार्फत प्रधानमन्त्रीलाई ज्ञापनपत्र बुझाउने त्यस्तै आश्वीन ६ गतेसम्म आफ्नो अनुकुल अनुसार कुनै एक दिन दुईघण्टा चक्काजाम आस्वीन १० गते जिल्ला र केन्द्रद्वारा पत्रकार सम्मेलन र असोज १२ गते देशव्यापी आम हडताल र नेपाल बन्दका कार्यक्रमहरु राखिएका छन् । उक्त कार्यक्रम सफल गर्न सम्पूर्ण जनता संघसंस्था वा राजनैतिक शक्तिहरुसित पनि अपिल गरिएको छ ।

वक्तव्यको पूर्ण विवरण

देशमा संविधानसभाको चुनाव सम्पन्न भएर गणतन्त्रको समेत स्थापना भइसक्यो । तर देश संकटबाट पूरै मुक्त हुन सकेको छैन । गणतन्त्रका विरुद्ध अहिले पनि कैयौं राजनैतिक शक्तिहरु सक्रिय छन् । देशको राष्ट्रियताको अगाडिको खतरा झन् पछि झन् गम्भीर बन्दै गइरहेको छ । संविधानसभामा राष्ट्रिय जनमोर्चालाई छाडेर अन्य सवै दलहरुले संघीयतालाई समर्थन गरेका छन् र संविधानसभाले पनि त्यसका पक्षमा निर्णय गरिसकेको छ । संघीयताका साथै आत्मनिर्णयको अधिकारका पक्षमा पनि आवाज उठिरहेको छ । त्यसबाट देशमा जातीय र क्षेत्रीय विग्रह र राष्ट्रिय विखण्डनको समेत गम्भीर खतरा उत्पन्न भएको छ । एक मधेश एक प्रदेशको आन्दोलनले पनि देशको अखण्डतामा आूच पुग्ने गम्भीर प्रकारको खतरा छ । गत फागुनमा सम्पन्न आठबँदे सम्झौतामा मधेश स्वायत्त प्रदेश तथा प्रदेशहरुलाई पूर्ण स्वायत्तताका मागहरु स्वीकार गरिएका छन् । त्यो सम्झौताले सम्पूर्ण तराईका मात्र होइन संघीय राज्य अन्तर्गतका सबै राज्यहरुलाई पूर्ण स्वायत्तता प्राप्त गर्न मार्ग प्रसस्त गर्दछ । समग्र रुपमा भन्दा संघीय व्यवस्थाले सम्पूर्ण देशमा जातीय र क्षेत्रहरुका बीचमा विग्रह राष्ट्रिय विखण्डन वा देशलाई टुक्रा टुक्रा पार्ने काम गर्ने गम्भीर खतरा छ ।

आज देशमा महंगी बढेर गएको छ । अपराधहरु अनियन्त्रित रुपले बढेका छन् र देशव्यापीरुपमा दण्डहिनताको स्थिति छ । ग्याँस पेट्रोलियमको मूल्यमा भारी वृद्धि भएको छ र बजारमा तिनीहरुको अत्यन्त ठूलो अभाव छ । देशको अर्थतन्त्र जर्जर बन्दै गएको छ । शोषित पीडित र मेहनतकश जनताका न्यायपूर्ण मागहरु प्रति उपेक्षाको नीति अपनाउने गरिएको छ ।

कोशी नदीको बाढीबाट ठूलो धनजनको क्षति भएको छ । त्यसप्रकारको क्षति खालि प्राकृतिक कारणले मात्र भएको नभएर भारतीय नीति र भारतसितको असमान नदी सम्झौता तथा नेपालका विभिन्न सरकारहरुका भारतपरस्त नीतिहरुका कारणले नै हुन गएको छ । देशका सिमा उद्योग व्यापार तथा सम्पूर्ण अर्थतन्त्र र राजनीतिमा समेत भारतीय विस्तारवादी अतिक्रमण र हस्तक्षेप बढ्दै गइरहेको छ । ती सवैका विरुद्ध अहिलेसम्म नेपालका कुनै पनि सरकारले प्रभावशाली कदम उठाउन सकेका छैनन् ।

उपरोक्त सवै समस्याहरु बारे देशव्यापी रुपमा आवाज उठाउन र सरकार माथि जनदवाव सृजना गर्नका लागि राष्ट्रिय जनमोर्चाले गणतन्त्रको सुदृढिकरण राष्ट्रियताको रक्षा वा संघीयताको विरुद्ध देशव्यापी रुपमा आन्दोलन संचालन गर्ने निर्णय गरेको छ । त्यससिलसिलामा श्रावण २० गते देखि हाम्रो आन्दोलनको कार्यक्रम सुरु भएर अहिलेसम्म इलाकास्तरीय मसाल जुलुस देशव्यापी मसाल जुलुस जिल्लास्तरीय अन्तरकि्रया कार्यक्रम सम्पन्न भइसकेका छन् । भाद्र २५ गते जिल्लामा प्रजिअ मार्फत प्रधानमन्त्रीलाई ज्ञापनपत्र त्यसपछि आश्वीन ६ गतेसम्म आफ्नो अनुकुल अनुसार कुनै एक दिन दुईघण्टा चक्काजाम आस्वीन १० गते जिल्ला र केन्द्रद्वारा पत्रकार सम्मेलन र असोज १२ गते देशव्यापी आम हडताल र नेपाल बन्दका कार्यक्रमहरु राखिएका छन् ।

उक्त कार्यक्रमहरुलाई सफल पार्न समर्थन र सहयोग गर्न हामीले सम्पूर्ण जनता संघसंस्था वा राजनैतिक शक्तिहरुसित पनि अपिल गर्दछौं ।

२०६५ भदौ १९ गते
चित्रबहादुर केसी
अध्यक्ष

सम्पर्क
राष्ट्रिय जनमोर्चा केन्द्रीय कार्यालय
साझा गल्ली, नयाँ बानेश्वर
काठमाडौं, फोन - ०१ ४७८५४०४