राष्ट्रपतिमा तीनजनाको नाम सिफारिस

by rn Thu Jul 17, 2008 4:05 pm NST

दलहरुले सर्वसम्मतमा राष्ट्रपतिको उम्मेदवार नभेटेपछि राष्ट्रपतिमा तीन जनाको उम्मेदवारी दर्ता भएको छ । दलहरु बीच सहमति हुन नसकेपछि छुट्टा छुट्टै मनोनयन दर्ता गराइएको हो ।

माओवादीसहित मधेशवादी दलहरुको समर्थनमा रामराजाप्रसाद िसंहले मनोनयन दर्ता गराउनुभएको छ । यसै गरी नेकपा एमालेबाट रामपि्रत पासवान र नेपाली कांग्रेसका डाक्टर रामवरण यादवले पनि राष्ट्रपतिमा उम्मेदवारी दर्ता गराउनुभएको छ । यसै गरी उपराष्ट्रपतिमा चार जनाको उम्मेदवारी परेको छ । एमालेबाट अष्टलक्ष्मी शाक्य माओवादीबाट शान्ता श्रेष्ठ र कांग्रेसबाट मानबहादुर विश्वकर्माको उम्मेदवारी परेको छ । राष्ट्रपतिमा रामराजाप्रसाद िसंहलाई समर्थन जनाएका मधेसवादीदल मधेशी जनअधिकार फोरम तराई-मधेश लोकतान्त्रिक पार्टी र सद्भावना पार्टीले उपराष्ट्रपतिमा परमानन्द झालाई उम्मेदवार बनाएका छन् ।

उम्मेदवारहरुको अन्तिम नामावली आजै साँझ पाँचबजे प्रकाशन हुने कार्यक्रम छ । यसअघि दलहरुबीच दुईपक्षीय छलफल भए पनि सहमती हुन सकेन । नेकपा एमालले प्रस्ताव गरेको नामलाई माओवादीले अस्वीकृत गरेको थियो । दलहरुबीच राष्ट्रपतिका विषयमा सहमति हुन नसकेपछि नेकपा माओवादी नेपाली कांग्रेस र नेकपा एमालेको छुट्टाछुटै बैठक बसेको थियो । बैठकपछि ती दलले आ-आफ्ना उम्मेदवारी दिने निर्णय गरेका थिए । यसपछि प्रमुख नेतासहित उम्मेदवारहरु संविधानसभा सचिवालयमा उम्मेदवारी दर्ता गराउन गएका थिए ।