जापान सरकारले सहयोग गर्ने

by rn Thu Jul 17, 2008 4:04 pm NST

जापान सरकारले नयाँ सरकारलाई सहयोग जारी राख्ने प्रतिवद्धता जनाएको छ । नेपाल भ्रमणमा आउनु भएका जापानी उपविदेशमन्त्री ओसानो उनोले नयाँ सरकारपछि जापानी सहयोग यथावत रहने प्रतिवद्धता जनाउनुभएको छ । जापान र नेपाल सरकारबीच आज काठमाडौंमा भएको एक सम्झौतापत्रको हस्ताक्षरपछि उहाँले नयाँ सरकारपछि पनि नेपालमा प्रजातन्त्र र दिगो शान्ति रहने आशा व्यक्त गर्नुभयो ।

यसैबीच जापान सरकार र नेपाल सरकारबीच काठमाडौंको कोटेश्वरदेखि सूर्यविनायकसम्मको सडक फराकिलो गर्ने सम्झौतापत्रमा भएको छ । यसका लागि जापान सरकारले नेपाल सरकारलाई १ अरब ७७ करोड ४७ लाख र ४० हजार अनुदान दिने भएको छ । आज अर्थ मन्त्रालयमा भएको एक कार्यक्रममा अर्थ सचिव रामेश्वर खनाल र मिस्जुनोबीच हस्ताक्षर भएको छ । हस्ताक्षर कार्यक्रममा अर्थमन्त्री डाक्टर रामबरण यादव र जापानी उप विदेशमन्त्री पनि सहभागी हुनुहुन्थ्यो । सम्झौताअुनसार दुई लेनको सडकलाई चार लेनको बनाइने छ । यसबाट नेपालमा ट्राफिक समस्या कम हुने आशा गरिएको छ । सम्झौतापछि अर्थमन्त्री डाक्टर रामशरण महतले नेपालको आर्थिक विकासमा जापान सरकारको सहयोग महत्वपूर्ण रहेको बताउनुभयो ।