निर्वाचनबाट राष्ट्रपति चयन हुने

by rajendra Sun Jun 8, 2008 1:42 pm NST

राष्ट्रपति चयन सर्वसम्मतबाट हुन नसके संविधानसभाभित्रको मतदानबाट राष्ट्रपति चयन गर्ने सहमति राजनैतिक पार्टीहरुले गरेका छन् । आज बिहान बसेको प्रमुख तीन दलको बैठकले यो निर्णय गरेको हो ।

नेपाली कांग्रेसका तर्फबाट राष्ट्रपतिका लागि गिरिजाप्रसाद कोइरालाको नाम प्रस्ताव गरिएकोमा नेकपा माओवादी र नेकपा एमाले दुबै दलहरुले यसलाई अस्वीकार गरेका थिए । यदि कोइरालालाई नै राष्ट्रपति बनाउनु पर्छ भनी कांग्रेसले अडान लिएमा मतदानबाट नै राष्ट्रपति चयन हुने निश्चित छ , नेकपा माओवादीका एक नेताले भने । उता नेकपा एमालेका महासचिव झलनाथ खनालले राष्ट्रपतिको चयन निर्वाचन बाट नै हुनुपर्ने र टिके राष्ट्रपतिलाई आफूले स्वीकार नगर्ने कुरा बताउँदै आएका छन् ।

राष्ट्रपतिको दावी परित्याग गरेका कारण राष्ट्रपतिको लागि मतदान प्रक्रिया भएमा नेकपा माओवादीले आफ्नो पार्टीभित्रकालाई उम्मेदवार नबनाउने भएको छ । यसका लागि गणतन्त्रवादी नेता रामराजाप्रसाद सिंहलाई उम्मेदवार बनाउने तयारी पार्टीभित्र भइरहेको बताइएको छ ।

यसअघि माओवादीले दाबी गर्दै आएको राष्ट्रपतिको अडान छाडेकोमा केही केन्द्रीय सदस्यहरुले भने आलोचना गरेका छन् । संविधान संशोधन गरी साधारण बहुमतबाट सरकार बनाउने र हटाउने प्रावधानलाई स्वीकार गर्न नहुने मत उनीहरुको रहेको छ ।