फेवातालमा जुलकुम्भी फाल्ने अभियान

by rn Sat Jun 7, 2008 6:11 pm NST

फेवातालमा बढिरहेको जलकुम्भी झार फाल्न सुरु गरिएको छ । यसवर्ष तालको सिरान खपौदी फाँटबाट जलकुम्भी फाल्न सुरु गरिएको हो । जनपथ सशस्त्र प्रहरी र नेपाली सेनाका झण्डै २५० जनशक्ति जलकुम्भी फाल्न खटिएका छन् । फेवा डुङ्गा समिति, फेवा मत्स्य व्यवसायी समिति र फेवा वातावरण सुधार समिति पनि झार फाल्न जुटेका छन् ।

पोखरा उपमहानगरपालिकाको अगुवाईमा सुरु भएको अभियानमा वातावरण मन्त्रालयले चार लाख ५० हजार रुपैंया दिएको छ । तालको ५८ हजार ४ सय वर्गमिटरमा फैलिएको जलकुम्भी फाल्न चार लाख ९३ हजार लाग्ने अनुमान गरिएको छ । मुख्य गरी खहरे गैह्राको चौतारो सेदीको फाँट सेदी खोला खपौदी पुरानो खोलाको मुख लगायतका क्षेत्रमा जलकुम्भी फैलिएको छ ।

स्वदेशी तथा विदेशी पर्यटकको मुख्य आकर्षणका रुपमा रहेको फेवाताललाई जलकुम्भी झारले कुरुप बनाए पछि वर्सेनि यो अभियान चलाउँदै आएका छन् ।