तीनदल बैठक बिना निष्कर्ष टुंगियो

by raju Sun May 25, 2008 1:32 pm NST

नयाँ सरकार गठन र राजनीतिक सहमतिका आधार तय गर्न आज बसेको प्रमुख तीन दलको बैठक विना निष्कर्ष टुंगिएको छ । प्रधानमन्त्री निवास बालुवाटारमा छलफलका लागि बसेको बैठकमा नेकपा माओवादी कांग्रेस र एमालेका शिर्ष नेताहरु सहभागी भएको थियो ।

माओवादीले सरकार गठनका लागि भोलिसम्म सहमति जुटाउने जानकारी गराएको छ । छलफलमा कांग्रेस र एमाले नेताहरुले माओवादी नेतृत्वलाई वाईसिएलका गलत कि्रयाकलाप अन्त्य गर्न र कब्जा गरिएका सम्पति फिर्ता गर्न आग्रह गरेका थिए । माओवादी अध्यक्ष प्रचण्डले आगामी दिनमा माओवादीका कुनै पनि तहबाट गलत कि्रयाकलाप हुन नदिने प्रतिबद्धता जनाउनुभएको थियो । काँग्रेस एमाले नेतृत्वले माओवादी अध्यक्षसंग प्रतिबद्धता भन्दा पनि व्यवहारमा रुपान्तरण हुन आग्रह गरेको थियो । प्रधानमन्त्री गिरिजाप्रसाद कोइरालाले माओवादी नेतृत्वलाई सरकार गठनका लागि सहमति जुटाउन औपचारिक आब्हान गरेलगत्तै आज बसेको प्रमुख दलहरुको बैठक भोली बिहान ८ बजे पुन बस्ने गरि टुंग्याएको थियो ।