व्यवसायी श्रेष्ठको हत्या प्रतिवेदन सार्वजनिक

by rn Sat May 24, 2008 3:13 pm NST

कोटेश्वरका होटल व्यवसायी रामहरि श्रेष्ठको काठमाडौंमा हत्याबारेको प्रारम्भिक अध्ययन प्रतिवेदन सार्वजनिक गरेको छ । प्रतिवेदन सार्वजनिक गर्दै राष्ट्रिय मानव अधिकार सरोकार केन्द्र नेपालका उपाध्यक्ष बोर्णबहादुर कार्कीले चोरीको अभियोग लागेकाहरुलाई एकै ठाउँमा राख्दा हुनसक्ने क्षतितर्फ कसैले ध्यान दिन नसक्दा दुःखद घटना भएको बताएका छन् ।

प्रतिवेदनमा सरोकार केन्द्रले चोरीको घटनालाई कानूनी प्रकि्रयातर्फ अगाडि बढाई छानबिन गर्नुपर्नेमा त्यसो नगरेर जनमुक्ति सेनाको तेश्रो डिभिजन कार्यालयका अधिकारीबाट गम्भीर गल्ती गरेको ठहर समेत गरेको छ । साथै प्रतिवेदनमा नेकपा माओवादीले संगठनका विभिन्न तहमा कार्यरत कार्यकर्ता तथा अधिकारीलाई फौजदारी अपराधसँग सम्बन्धित घटनाहरु आफैंले छानबिन र अनुसन्धान गर्ने प्रकि्रया र पद्धति छोड्नुपर्ने निष्कर्ष निकालिएको छ ।

संस्थाका अध्यक्ष मुक्ति प्रधानले सार्वजनिक गरिएको प्रतिवेदन प्रारम्भिक मात्र भएकोले घटनाका बारेमा सरकार र माओवादीबाट गठित छानबिन आयोगहरुले तत्काल आफ्नो कार्य प्रारम्भ गरी यथासक्य छिटो प्रतिवेदन सार्वजनिक गर्नुपर्ने बताए । साथै उनले घटनालाई राजनीतिकरण गरिए मृतकका परिवारले घटनाबारे एकिन जानकारी पाउन नसक्ने अवस्था सिर्जना हुने र घटनाको वास्तविकता ओझेलमा पर्नसक्ने आशंका पनि व्यक्त गरे । साथै माओवादीले यस्ता घटनामा सम्बन्धित प्रहरी कार्यालयमा सूचना गर्नुपर्ने कडा निर्देशन आफ्ना मातहतका निकायलाई दिन पनि आग्रह गरेको छ । नागरिकको जीवन र उसको व्यक्तिगत स्वतन्त्रताको महत्व र रक्षामा जिम्मेवार बन्न सकेमा यस्ता घटना नघट्ने प्रतिवेदनमा लेखिएको छ ।