गृहमन्त्री र प्रहरी महानिरीक्षकलाई खुल्ला पत्र

तीर्थ गुरुङ

कृष्ण प्रसाद सिटौला नाम गरेका एकजना व्यक्ति छन् नेपालमा जो नेपालका आफूलाई गृहमन्त्री हुँ भन्ने दावी गर्छन । यी कस्ता खालका गृहमन्त्री हुन भन्ने कुरा त यिनको बारेमा यहाँ धेरै बखान गरेर समय खर्चन चाहन्न । यी यस्ता गृहमन्त्री हुन जसले संविधानसभाको चुनावमा आफ्नो पार्टी नेपाली काँग्रेसलाई इतिहासमा कहिल्यै नविर्सन सकिने किसिमले चुनावी हारको उपहार दिएका छन । काँग्रेसका कार्यकर्ताको थुप्रै अनुरोधलाई यिनले नकारे शान्ति सुरक्षा भएन भनेर जिल्लाका कार्यकर्ताहरुले आवाज उठाउँदा समेत कुनै वास्ता नगर्दाको परिणाम बन्न पुग्यो चुनावी हार । कृष्ण प्रसाद सिटौलाजी लाई के पीर थियो भने माओवादीको ज्यादतीको विरुद्ध कानुनी प्रकृया अपनाउँदा कतै माओवादीहरु रिसाउने त होइन । वास्तवमा यिनले देशको शान्ति सुरक्षा गर्ने निकायलाई माओवादीको चाकरी गर्ने क्रममा यति साह्रो पङ्गु बनाएका छन की आजकल वाइसीएले कुनै पनि कृयाकलाप प्रति नेपाल प्रहरी मुकदर्शक भएर बस्छ । केही गर्न सक्दैन । किनभने नेपाल प्रहरीको हात गृहमन्त्री सिटौलाले बाधेर राखेका छन । संक्षेपमा भन्नु पर्दा कृष्ण प्रसाद सिटौला देशका गृहमन्त्री नभइ माओवादीका सकृय कार्यकर्ता हुन । गृहमन्त्रीको हैसियतले उनले कुनै सकृय भूमिका अपनाएको देखिदैन । यिनी त माओवादीको सवारी मन्त्री भन्दा थप अरु केही हुनै सक्दैनन । यिनको यही कृयाकलापले गर्दा नेपाल प्रहरीका कुनै पनि कर्मचारी यिनीप्रती सन्तुष्ट छैनन । सलाम खाएर मख्ख पर्दैमा ठुलो मान्छे भईदैन सिटौला जी । बसन्त कुवंरले तपाई प्रति व्यक्त गरेको अभिव्यक्ति त एउटा नमूना मात्र हो । यस्ता असन्तुष्टी त अ´ धेरै छन् प्रहरी संगठनभित्र ।

यहाँ कुरा गर्न खोजेको चाही माओवादीद्वारा अपहरण पछि मारिएका कोटेश्वरका व्यापारी रामहरी श्रेष्ठको सम्बन्धमा हो । आजका दिन सम्म आईपुग्दा माओवादीले व्यक्त गरेका अभिव्यक्ति आकाश र जमीन फरक पर्न गएको छ । यति विघ्न जनमतबाट ठुलो दल बन्न पुगेको माओवादी पार्टीको यस प्रकारको गैर जिम्मेवारी पुर्ण अभिब्यक्तिले अनेक शङ्का उव्जाएको छ । तल्ला तहका कार्यकर्ताले भनेका गरेका गलत कुराहरुलाई माओवादीका माथिल्ला तहका नेताहरुले समेत ढाकछोप गर्नु लाजमर्दो कुरा हो । अब देशको सत्ता आफ्नो हातमा आउन लागेको बेलासम्म पनि किन यी माओवादीहरु सुध्रन नसकेका होलान । आज सडकमा रामहरी श्रेष्ठको पक्षमा उनको निर्मम हत्याको विरोधमा स्वतः स्फुर्त जुन जनलहर सडकमा देखा परेको छ त्यस समुहलाई माओवादी अध्यक्ष प्रचण्डले प्रतिकृयावादी देख्न थालेका छन । धमीलो पानीमा माछा मार्न खोजेको भन्न समेत पछि परेनन । माओवादीबाट व्यक्त हुने सहानुभुती शव्दहरु त केवल गोहीको आँसु मात्र हो भन्दा फरक पर्दैन ।

यति धेरै तथ्यहरु प्रकाशमा आई सक्दा पनि देशको एकमात्र गृह प्रशासन किन मौन छ किन आजसम्म एउटा वक्तव्य समेत आउंदैन । म एउटा साधरण नागरिकको हैसियतले बुझ्न सकिरहेको छैन । आजका दिनसम्म भन्ने हो भने गृह प्रशासनले एउटा उच्चस्तरीय छानविन आयोग बनाई सक्नु पर्ने थियो । अपराध अनुसन्धान गर्ने एकमात्र निकायका प्रमुख ओमविक्रम राणा ज्यु तपाई पनि किन शिथिल हुनु भएको के तपाईले प्रहरी प्रधान कार्यालयबाट कुनै टोली खटाउन सक्नु हुन्न अनुसन्धानका लागी । हुन त तपाई पनि गृहमन्त्री जस्तै लाचार महानिरीक्षक हुनुहुन्छ भन्दा फरक पर्दैन । रामहरीको हत्याको अनुसन्धानका लागी कडा आदेश दिदाँ कतै तपाईहरुको पदावधी समाप्त हुन्छ भन्ने डर हो की । अन्तमा तपाईहरुको यस्तो लाचारीपन देख्दा म आफैलाई लाज लागेर आईरहेको छ । अनि सोच्ने गरेको छु यो देश कानुनी राज्य त हो । हो भने किन यस्तो जङ्गली राज भईरहेको छ त । आज रामहरी श्रेष्ठलाई पर्न गएको समस्या भोली हामी र हाम्रा परीवारजनहरुलाई पनि पर्न सक्छ भन्ने किन हेक्का नभएको होला यी गृहमन्त्री र प्रहरी महानिरीक्षकलाई । अब त सदबुद्धि आउने थियो की । तपाईहरुले समयमानै आफ्नो कर्तव्य पालन गर्नोस नत्र लाजै नमानी पद सम्हालेर बस्न नैतिकताले दिदैन । आज सडकमा देखिएको रामहरी श्रेष्ठको हत्या विरुद्धको जनआक्रोश मानवीय समवेदना र भावानात्मक लहरको समर्थन हो । दोषीलाई समयमानै कठघरामा उभ्याईएन भने जनआक्रोश अझ बढेर जाने छ ।