बनेपामा चण्डेश्वरी जात्रा मनाइदै

by rn Wed May 21, 2008 2:30 pm NST

काभ्रेको बनेपामा परम्परागत चण्डेश्वरी जात्रा धुमधामका साथ मनाइंदैछ । धार्मिक ग्रन्थका अनुसार चण्डेश्वरी जात्रा सत्रौ शताब्दीदेखि चल्दै आएको बिश्वास छ ।

प्रत्येक बर्ष बैशाख पुर्णिमामा मनाइने यो जात्रामा भाग लिन काभ्रेका बिभिन्न भागका साथै छिमेकी जिल्ला काभ्रे सिन्धुपाल्चोक र रामेछापबाट समेत सर्वसाधारण बनेपा आएका छन् । तीन दिनसम्म चल्ने जात्राको पहिलो दिन मंगलबार रित्तो रथलाई बाजागाजा र भजनसहित चण्डेश्वरी मन्दिर पुर् याइएको थियो । हजारौं दर्शक र धर्मावलम्बी रथयात्रामा सहभागी भएका थिए । चण्डेश्वरी मन्दिर पुर् याइएको रथमा चण्डेश्वरीको मुर्ति राखी पुनः बजार परिक्रमा गरेपछि जात्रा सकिने परम्परा छ । चण्डेश्वरी मन्दिर लैजाने क्रममा घोडेचौरको ठाडो उकालोमा नबिसाई रथ लैजानुपर्ने चलन छ । यो दृष्य सबैका लागि आकर्षक बन्ने गरेको छ । पाङ्ग्रा नभएको सबैभन्दा ठूलो रथ काँधमा बोकेर बजार परिक्रमा गराइने भएकाले जात्रा थप आकर्षक बन्ने गरेको छ ।

धार्मिक परम्पराअनुसार मृगस्थलीबाट आएका जोगीले पूजाआजा गरी भेडाको बली दिएपछि मुख्य जात्रा सुरु हुन्छ । दोस्रो दिन रथलाई कन्याहरुद्वारा पूजा र कलनदान गरेपछि तेस्रो दिन रथ फुकालिन्छ । परापूर्वकालमा देवतालाई दुःख दिने चण्डासुर दैत्यलाई बनेपास्थित रक्तचन्दन बनबाट उत्पति भई चण्डेश्वरीले मारेको खुशीयालीमा यो जात्रा मनाउन थालिएको किंवदन्ती छ ।