यातायात व्यवसायीले इटहरीमा गाडी तोडफोड

by rn Wed May 14, 2008 3:02 pm NST

आफूहरुको माग प्रति सरकार गम्भीर नभएको भन्दै हिजोदेखि नेपाल यातायात ब्यवसायी महासंघले पूर्वाञ्चलमा गरेको सार्वजनिक यातायात बन्द आज पनि कायमै रह्यो । आज बन्दको अवज्ञा गरेको भन्दै यातायात व्यवसायीले इटहरीमा केही गाडी तोडफोड गरेका छन् । व्यवसायीले काठमाडौंबाट इटहरी जाँदै गरेको ना २ ख २६२६ र ना १ ख ८११ नंम्बरको बसमा तोडफोड गरेका छन् । त्यस्तै को १ ख ७९३ ना ३ ख ५८५८ र ना २ ख ३०१० नम्बरको ट्रकमा समेत तोडफोड गरेको हाम्रा सहकर्मीले बताएका छन् ।

त्यसै गरी इटहरीबाट इलामतर्फ जाँदै गरेको मे १ च ५१२ नम्बरको एम्बुलेन्स पनि यातायात व्यवशायीले नियन्त्रणमा लिएका छन् । विभिन्न माग राखी आन्दोलित यातायात व्यवशायीले आब्हान गरेको बन्दका कारण आज पनि जनकपुरदेखि पूर्वको यातायात ठप्प छ ।

यसैबीच बर्दियाको गुलरीया नेपालगाज सडक खण्ड पनि अवरुद्ध भएको छ । नेपालगंजबाट गुलरीया गइरहेको ना २ ख १९५१ नम्वरको ट्रकले ठक्कर दिंदा गम्भिर घाइते भएका स्थानीय जीतराम थारुको नेपालगंजमा उपचार गर्न लैजादै गर्दा बाटोमा मृत्यु भएपछि उनका आफन्त र स्थानीयवासीले सडक अवरुद्ध गरेका हुन् । त्यस्तै महेन्द्रनगरको पश्चिमी सिमानाका गड्डा चौकीमा आवागमन बन्द भएको छ ।