अन्तर्राष्ट्रिय नेपाली साहित्य सम्मेलनका लागि न्यूयोर्क व्यस्त

अगष्ट १५ आयोजना हुने अन्तर्राष्ट्रिय नेपाली साहित्य सम्मेलनको तयरीमा न्यूयोर्क जुटेको छ । अन्तर्राष्ट्रिय नेपाली साहित्य समाजको आयोजना तथा न्यूयोर्क च्याप्टरको तत्वावधानमा हुन गइरहेको सो सम्मेलनको तयारीका लागि च्याप्टरले विभिन्न उपसमितिहरु गठन गरेको छ ।

प्राप्त जानकारी अनुसार मिलन शाहीको संयोजकत्वमा साँस्कृतिक कार्यक्रम हुने र बसोबासको संयोजकत्व परिता राजभण्डारीले गर्नु हुने छ । त्यसैगरी खानपिन व्यवस्थापनका लागि नर्मदा क्षेत्रीले संयोजकत्व गर्नु हुनेछ भने आगन्तुक रजिष्ट्रेशन व्यवस्थापनमा पुनम काफ्लेले संयोजन गर्नु हुनेछ भने उपहार तथा व्याज व्यवस्थापन विनोद रोका र राजेन्द्र श्रेष्ठको संयोजकत्व तथा सहभागितामा हुनेछ ।

आर्थिक व्यवस्थापन तथा संकलन समाजकी केन्द्रीय कोषाध्यक्ष तथा आर्थिक समितिकी सहसंयोजक कमला प्रसाईको संयोजकत्वा पुष्प शर्मा मणि वाङ्देल मीठू थापा संजय थापा र सीता खरेल सदस्य रहेको उपसमितिबाट हुने छ ।

सम्मेलनलाई सफल बनाउनका लागि अमेरिकास्थित नेपाली भाषा तथा मूलका सम्पूर्ण संचार माध्यमहरुको सकि्रय सहभागिता तथा संचार व्यवस्थापनका लागि अन्तर्राष्ट्रिय नेपाली साहित्य समाजले हार्दिक अपील पनि गरेको छ ।

सम्मेलनमा नेपाली भाषा-साहित्यका वारेमा विभिन्न बहस छलफल तथा प्रस्तुतिहरु रहने, गीत, कविता, गजल आदि श्रवण कार्यक्रम एवं साँस्कृतिक कार्यक्रम समेत हुने बताइएको छ । अमेरिकामा पहिलो पटक हुन गइरहेको सम्मेलनमा नेपाल भारत लगायत विश्वका विभिन्न देशमा छरिएर रहेका नेपाली भाषी लेखक तथा कविहरुको सहभागिता उल्लेख्य रहने आशा आयोजक संस्थाले गरेको छ ।