दुई संस्कृतिकर्मी अस्ताए

by subhash Thu May 1, 2008 11:53 am NST

नेपाली संस्कृतिका दुई साधकहरु - सुवि शाह र लीलाभक्त मुनंकर्मी अब हामी माझ रहेनन् । नेपाली लोक संगीतका अन्वेषक र कलाकार सुवि शाह गत शनिवार र संस्कृतिविद् इतिहासकार लीलभक्त मुनंकर्मी सोमबार हामीबाट टाढिएका छन् ।

नेपाली लोक संगीतको अध्ययन अनुसन्धानमा आफ्नो जीवन समर्पण गरेका सुवि शाह (सुरेन्द्रविक्रम शाह) स्वयम् एक प्रतिभावान कलाकार थिए । उनी बाँसुरी, मादल र मुर्चुङ्गाका कुशल वादक थिए । उनको कृति 'मादल' पुस्तकले नेपाली लोक संगीत अनुसन्धानमा ठूलो मूल्य राख्दछ ।

इतिहासकार लीलाभक्त मुनंकर्मी स्वाध्यायनबाट इतिहास र संस्कृति अन्वेषणमा उदाएका व्यक्ति हुन् । नेपाली इतिहास र संस्कृतिमा अध्ययनमा आफ्नो जीवनको अधिकांश समय व्यतीत गरेका उनका 'तुलजा भवानीको थापूजा र पर्वपूजा विधि', 'मध्यकालीन इतिहास', 'नेपालको ऐतिहासिक तथा सांस्कृतिक दर्पण', 'बिस्केट जात्राको संस्कृति', 'भूपतीन्द्र मल्लका कृति तथा अभिलेखहरु', 'संक्षिप्त मातृका वर्णन तथा देवीनाच' आदि गरी एक दर्जनभन्दा बढि कृति प्रकाशित छन् ।