सबैको ध्यान समानुपातिकतर्फ

by rajendra Wed Apr 16, 2008 4:29 am NST

संविधानसभा निर्वाचनमा प्रत्यक्षतर्फ नेकपा माओवादीको बहुमत आउने निश्चितप्रायः भइसकेपछि अब सबैको ध्यान समानुपातिक परिणामतर्फ तानिएको छ । प्रत्यक्षमाजस्तै समानुपातिकमा पनि अन्य दलहरुभन्दा माओवादी नै अग्रस्थानमा रहेको छ ।

समानुपातिकको हालसम्मको झण्डै २५ लाख मतगणना परिणाम अनुसार माओवादीको पक्षमा एकतिहाई मत खसेका छन् । यसप्रकार सिंगो संविधानसभामा नै माओवादीको वर्चश्व रहने अब निश्चित नैं भइसकेको छ । तर सिंगो संविधानसभामा बहुमत ल्याउन भने माओवादीले समानुपातिक तर्फ कूल खसेको मतको ४० प्रतिशत मत ल्याउनुपर्ने हुन्छ ।

निर्वाचन प्रणाली अनुसार प्रत्यक्षतर्फ २४० सीट रहने छन् भने समानुपातिक तर्फ ३३५ सीट रहने छन् । नयाँ बन्ने सरकारले २६ जना मनोनयन गर्नेछ । यसप्रकार जम्मा ६०१ सदस्य सम्मिलित संविधानसभामा दलहरुको स्थिति कस्तो रहने छ भने चाहिं सम्पूर्ण मतगणना परिणाम आएपछिमात्र स्पष्ट हुनेछ ।