पेट्रोलियम पदार्थमा भएको मूल्यवृद्धि फिर्ता लिन निर्देशन

by raju Wed Jan 23, 2008 4:30 pm NST

सरकारले पेट्रोलियम पदार्थमा भएको मूल्यवृद्धि फिर्ता लिन नेपाल आयल निगमलाई निर्देशन दिएको छ । आज बसेको मन्त्रिपरिषद्को अनौपचारिक बैठकले निगमलाई पेट्रोलियम पदार्थमा गरेको मूल्यवृद्धि फिर्ता लिन निर्देशन दिएको हो । प्रधानमन्त्री तथा मन्त्रिपरिषद्को कार्यालय सिंहदरबारमा बसेको बैठकले नजिकिंदो संविधानसभा चुनावलाई मध्यनजर गर्दै मुल्यवृद्धि फिर्ता लिन निर्देशन दिएको उद्योग वाणिज्य तथा आपूर्तिमन्त्री श्यामसुन्दर गुप्ताले बताउनुभयो ।

नेपाल आयल निगमले माघ ५ गते डिजेल मट्टितेल र ग्यासको मूल्यवृद्धि गरेको थियो । निगमले ११ सय रुपैयाँ रहेको ग्यासको भाउ बढाएर १२ सय ५० पुगेको पुर् याएको थियो । त्यस्तै एक लिटर डिजेलमा पाँच रुपैयाँ बढाएर ६१ रुपैयाँ ३९ पैसा पुर् याएको थियो भने एक लिटर मट्टितेलमा दश रुपैयाँ बढाएर ६१ रुपैयाँ पुर् याएको थियो ।

यसैबीच मूल्यबृद्धि फिर्ता लिने सरकारको निर्णयसंगै मूल्यवृद्धिको विरोधमा आज भएको उपत्यका बन्द पनि फिर्ता भएको छ । मूल्यवृद्धिविरुद्ध नेकपा एकीकृत का सवै भातृसंगठनहरुले आज उपत्यका बन्द आव्हान गरेका थिए । मूल्यवृद्धि फिर्ता लिन सरकारले आयल निगमलाई निर्देशन दिए लगत्तै दिउँसो ३ बजेदेखि फिर्ता लिएको बन्द आह्वानकर्ताले जनाएको छ । यसैगरी देशभर बिहानैदेखि भैरहेको प्रर्दशन पनि सामान्य हुँदै गएको छ ।

यसअघि पेट्रोलियम पदार्थमा भएको मूल्यवृद्धिको देशव्यापी रुपमा कडा विरोध भएको थियो । आज विहानैदेखि उपत्यकाका प्रमुख चोकहरुमा मूल्यवृद्धि फिर्ता गर्न माग गर्दै विद्यार्थीहरुले प्रदर्शन गरेका थिए । प्रदर्शनका क्रममा ठाउँठाउँमा प्रहरी र प्रदर्शनकारीबीच झडप भएको थियो । प्रहरीले अखिल एकीकृतका केन्द्रीय महासचिव गजेन्द्र न्यौपानेसहित २२ जनालाई पक्राउ समेत गरेको थियो । विद्यार्थीहरुले काभ्रेमा टायर बालेर अरनिको राजमार्ग अवरुद्ध पारेका थिए भने चितवनमा पनि प्रदर्शन भएको थियो । त्यसैगरी विराटनगर भैरहवा धरान इटहरी रौतहट अर्घाखाँची धादिङ नवलपरासीको अरुणखोला गैंडाकोटलगायतका क्षेत्रमा पनि विद्यार्थीहरुले आपुर्तिमन्त्रीको राजीनामा माग्दै टायर बालेर प्रर्दशन गरेका थिए । पाल्पाको तानसेन र रामेछापको मन्थलीमा पनि विद्यार्थीहरुले प्रदर्शन गरेका थिए ।

यसैगरी बिभिन्न राजनीतिक दल र संघसंगठनहरुले पनि बिज्ञप्ति निकाली मूल्यबृद्धिको विरोध गरेका थिए । राष्ट्रिय जनशक्ति पार्टी नेपाल ट्रेड युनियन महासंघ जिफन्ट नेपाल यातायात स्वतन्त्र मजदूर संगठन र नेपाल स्वरोजगार ब्यायार श्रमिक संघले पेट्रोलियम पदार्थमा भएको मूल्यबृद्धि फिर्ता लिइ निगमभित्रको भ्रष्टाचार सार्वजनिक गर्न माग गरेको थियो ।