पोखरामा लेखनाथ महोत्सव

by raju Wed Jan 23, 2008 1:11 pm NST

सात तालको सुन्दर नगरी पोखरामा लेखनाथ महोत्सव हुने भएको छ । पोखरा उपत्यकाको आर्थिक तथा सामाजिक उत्थानका लागि माघ १८ देखि २७ गतेसम्म लेखनाथ नगरपालिका वडा नम्वर १ मा महोत्सव हुने लेखनाथ उद्योग संघका अध्यक्ष वावुराम जमकट्टेलले हिजो काठमाडौंमा पत्रकार सम्मेलन गरी जानकारी दिनुभएको छ ।

नेपाल उद्योग वाणिज्य महासंघ लेखनाथ उद्योग वाणिज्य संघ र उद्योग वाणिज्य तथा आपुर्ति मन्त्रालयले महोत्सव गर्ने भएका हुन् । महोत्सवमा कृषि मेला सुन्तला माछा मह तरकारी जैविक विविधता र खाद्य परिकारको पनि प्रदर्शनी गरिनेछ । आयोजकले महोत्सवमा ८ करोड रुपैंयाको व्यापार गर्ने लक्ष्य लिएका छन् भने ३ लाखजनाले महोत्सव अवलोकन गर्ने अपेक्षा गरिएको छ ।

महोत्सवमा ३ सय स्टल राखिने भएका छन् । प्रदर्शनीका लागि आन्तरिक प्रचारप्रसार सूचना सम्प्रेषण स्वागत गेट निर्माणको काम लगभग सकिइसकेको छ । सांस्कृतिक विविधताको धनी गण्डक क्षेत्रका झाँकी र नृत्य पनि महोत्सवमा प्रस्तुत गरिने जानकारी गराइएको छ ।