निर्वाचन पर्यवेक्षण गर्न अमेरिकी पूर्व राष्ट्रपति नेपाल आउने

by dinesh Wed Apr 2, 2008 9:01 am NST

संयुक्त राज्य अमेरिकाका पूर्व राष्ट्रपति जिम्मी कार्टर तथा उनकी धर्मपत्नी रोजालिन आगामी संविधानसभा निर्वाचनका लागि विदेशी पर्यवेक्षण टोलीका टोली प्रमुखका रुपमा नेपाल आउने भएका छन् । कार्टर सेन्टरका अनुसार कार्टर दम्पति अप्रिल ७ तारिखका दिन काठमाडौं आईपुग्ने छन् ।

झन्डै २० भन्दा बढी देशका ६० पर्यवेक्षक रहने यस पर्यवेक्षण टोलीमा थाईल्याण्डका पूर्व उप प्रधानमन्त्री सुराकियार्ट साथीरथाइ उप प्रमुखका रुपमा रहने छन् । नेपाल बसाई अवधिमा यस टोलीले राजनैतिक पार्टीका नेताहरु र विभिन्न कूटनैतिक संस्थाका प्रमुखहरुलाई भेटघाट गर्नुका साथै संविधानसभा निर्वाचनको अनुगमन गर्नेछ ।