बालुवाटारमा भेटघाट

by rn Sat Mar 15, 2008 1:12 pm NST

नेपालका लागि भारतका राजदुत शिवशंकर मुखर्जी र अनमिन प्रमुख ईयान मार्टीनले आज प्रधानमन्त्री गिरिजाप्रसाद कोइरालासँग बेग्ला बेग्लै छलफल गर्नुभएको छ । राष्ट्रसंघीय राजनीतिक मिसन अनमिन प्रमुख ईयान मार्टीनले राजनीतिक घटनाक्रम र चुनावी तयारीबारे प्रधानमन्त्रीसँग छलफल गरी बाहिरिएलगत्तै भारतीय राजदुत मुखर्जी बालुवाटार पुग्नुभएको थियो ।

मार्टिनले चुनावमा राष्ट्रसंघको थप भूमीका कस्तो हुने भन्नेबारे प्रधानमन्त्रीसँग छलफल गर्नुभएको थाहा भएको छ । नेपालको पछिल्लो अवस्थाबारे बुभन महासचिव वान की मुनले खटाउनुभएको विशेष टोली अहिले काठमाडौंमा छ । मार्टिनसँगै त्यस टोलीका सदस्यले पनि प्रधानमन्त्री कोइरालासँग छलफल गरेको छ । नेपाल भ्रमण सकेर फर्केलगत्तै टोलीले तयार पार्ने प्रतिवेदन महासचिव मुनलाई बुझाउने छ ।

अनमिनले यसैसाताबाट चुनाव अनुगमन गर्न स्थानीय तहमा चुनावविज्ञलाई खटाउने घोषणा यसअघि नै गरिसकेको छ । भारतीय राजदूत मुखर्जीले तराईको सुरक्षा र चुनावमा सीमा क्षेत्रबाट भारतले गर्नसक्ने सहयोगबारे प्रधानमन्त्री कोइरालासँग छलफल गर्नुभएको बालुवाटारस्रोतको भनाइ छ ।