अब मेशिनबाट मतदान

by dinesh Mon Mar 10, 2008 1:40 am NST

नेपालको पहिलोपल्ट मतदानका लागि मेशिन प्रयोग गरिने भएको छ । निर्वाचन आयोगले परीक्षण स्वरुप ५० हजार ३५ मतदाता र ५६ वटा मतदान केन्द्र रहेको काठमाडौं क्षेत्र नं १ मा मेशिन प्रयोग गरी विद्युतीय प्रणालीअन्तर्गत मतदान गर्ने कार्यक्रम बनाएको छ ।

यो मेशिनको प्रयोगबाट मतदान गर्न मतपत्र र मत पेटिका चाहिंदैन । विद्युतीय यन्त्रमा रहेको चिन्हमा स्वीच थिचेर मतदान गर्न सकिने छ । निर्वाचन चिन्हसँगै भएको स्वीच थिचेपछि सो चिन्हमा मतदान हुनेछ । स्वीच थिच्ने काम भने मतदान अधिकृतको नियन्त्रणमा हुनेछ ।

यो प्रणाली आगामी निर्वाचन पछि देशव्यापी रुपमा प्रयोग गरिने बताइएको छ । विद्युतीय प्रणालीबाट मतदान गर्ने यो मेशीन भारतले सहयोग स्वरुप उपलव्ध गराएको हो ।