पेट्रोलियम पदार्थमा भएको मूल्यवृद्धिको देशव्यापी विरोध

by raju Tue Jan 22, 2008 2:57 pm NST

पेट्रोलियम पदार्थमा भएको मुल्यवृद्धिको देशव्यापी विरोध भएको छ । काठमाडौंका अधिकांश क्याम्पस अगाडि विद्यार्थीले विरोध प्रदर्शन गरिरहेका छन् । काठमाडौंको पशुपति अस्कल आरआरलगायतका क्याम्पसमा विद्यार्थीहरुले मूल्यवृद्धिका विरुद्ध नाराबाजी गर्दै टायर बालेर सडक अवरुद्ध गरेका छन् । क्याम्पसबाहेक विभिन्न चोकमा पनि प्रदर्शन भएका छन् । प्रदर्शनका क्रममा केही ठाउँमा विद्यार्थी र प्रदर्शनकारीबीच झडपसमेत भएको छ ।

विद्यार्थी मात्र होइन सर्वसाधारण पनि मुल्यवृद्धिको विरोधमा सडकमा उत्रिएका छन् । प्रदर्शनकारीले मूल्यवृद्धि तत्काल फिर्ता लिन माग गरिरहेका छन् । मूल्यवृद्धिको विरोधमा गरिएको प्रदर्शनका कारण काठमाडौं उपत्यकाका यातायात अवरुद्ध भएको छ । काठमाडौंका रत्नपार्कमा प्रदर्शनमा उत्रिएका सर्वसाधारणमाथि प्रहरीले १० राउन्ड भन्दा बढी अश्रुग्यास प्रहार गरेको छ । पुरानो बसपार्कमा जम्मा भएका प्रदर्शनकारीले प्रहरीमाथि ढुंगा प्रहार गर्न थालेपछि अश्रुग्यास प्रहार गरिएको हो । प्रदर्शनकारीले चारैतिर प्रहरीलाई घेरा हाली ढुंगाप्रहार गरेका थिए । ढुंगा प्रहार गर्न थालेपछि प्रहरीले प्रदर्शनकारीलाई नियनत्रण गर्न खोजेको थियो । तर नियन्त्रण गर्न सकेन । झडपमा केही प्रदर्शनकारी र प्रहरी पनि घाइते भएका छन् ।

काठमाडौंको नक्साल हात्तीसार कमलपोखरी पुतलीसडक बागबजारलगायतका क्षेत्रका मुख्य चोकमा प्रदर्शनकारीले मूल्यवृद्धिको बिरोधमा नाराजुलुस गरेका छन् । त्यस्तै पशुपति, अमृत साइन्स, आरआर शंकरदेवलगायतका क्याम्पसका विद्यार्थीहरुले मूल्यवृद्धि विरुद्ध नाराबाजी गर्दै टायर बालेर सडक अवरुद्ध गरेका छन् । प्रदर्शनकारीले मूल्यवृद्धि तत्काल फिर्ता लिन माग गरेका छन् ।

मूल्यवृद्धिको बिरोध गरिरहेका बेला हात्तीसारमा जलस्रोत मन्त्री ज्ञानेन्द्रबहादुर कार्कीको गाडिलाई प्रहरीले बल प्रयोग गरी स्कर्टिङ गरेपछि प्रदर्शनकारी झनै आक्रमक भएका थिए । सरकारले संविधासभाको चुनाव नजिकिदै गएको बेला मूल्यवृद्धि गरेको भन्दै सरकारले संविधानसभाको चुनाव गर्न नचाहेको प्रदर्शनकारीले आरोप लगाएका छन् । प्रर्दशनकारीले उद्योग बाणिज्य तथा आपूर्ति मन्त्रीको राजीनामा माग गर्दै संसद् र सात दलको तीब्र आलोचना गरेका छन् ।

यस्तै बिहानैदेखि चोक गल्लि तथा सडकमा आगो बालेर विद्यार्थी ब्यापारी तथा सर्वसाधारणले मूल्यवृद्धिको बिरोध गरेका छन् । सात राजनीतिक दल नेता तथा सरकार जनताप्रति उत्तरदायि नभएको भन्दै उनीहरुले सरकार विरोधी नारा लगाएका छन् । चुनावको मुखमा सांसदलाई दशलाख बाँड्ने तर जनतालाई मूल्यबृद्धिको भारी बोकाउने सरकार नालायक भएको उनीहरुको भनाइ छ ।

यसैबीच पेट्रोलियम पदार्थको मूल्यवृद्धिको विरोध गर्दै विराटनगरका व्यवसायी नागरिक र मजदूरहरुले आज विराटनगर बन्द गरेका छन् । विराटनगरका सर्वसाधारण सडकमा निस्किएर मूल्यवृद्धिको विरोध गरेका छन् । विराटनगरका मुख्य सडक र चोकहरुमा टायर बालेर उनीहरुले यातायातका अवरोध पुर् याएका छन् । यस्तै पाल्पा इटहरी नेपालगन्ज पोखरालगायतका शहरहरुमा पनि विरोध प्रदर्शन भइरहेको स्थानीय सहकर्मीहरुले जनाएका छन् ।

सरकारले गएराति १२ बजेदेखि लागू हुनेगरि पेट्रोलियम पदार्थमा फेरि मूल्यबृद्धि गरेको हो । जस अनुसार डिजेलमा पाँच रुपैयाँ मट्टितेलमा १० रुपैया र ग्याँसमा प्रतिसिलिण्डर एक सय ५० रुपैयाँ मूल्यबृद्धि गरिएको छ । मूल्यवृद्धिअनुसार डिजेल र मट्टितेलको मूल्य एकै बनाइ प्रतिलिटर ६१ रुपैयाँ कायम गरिएको छ । त्यसैगरी ग्यासको प्रतिसिलिण्डर १२ सय ५० बनाइएको छ । विगत तीन महिनाको अवधिमा सरकारले गरेको यो तेस्रो मूल्यवृद्धि हो ।

इन्डियन आयल कर्पोरेशनलाई तिर्नुपर्ने बक्यौता रकम भुक्तानी गर्न अर्थ मन्त्रालयले ऋण दिँदा मूल्य समायोजन गर्नुपर्ने सर्त राखेकाले मूल्यबृद्धि गरिएको नेपाल आयल निगमले जनाएको छ । उता उद्योग वाणिज्य तथा आपुर्तिमन्त्री श्यामसुन्दर गुप्ताले कि आयल निगम बन्द गर्नुपर्ने कि मूल्य समायोजन गर्नुपर्ने विकल्पमध्ये मूल्य समायोजन गर्ने विकल्प रोजिएको बताउनुभयो ।