दुर्घटनै दुर्घटना

by raju Wed Mar 5, 2008 1:53 pm NST

नुवाकोटको मदनपुर गाविस वडा नम्बर ६ को सिंगानेखोलामा आज बिहान टाटा मोवाइल गाडी दुर्घटना हुँदा एक जनाको मृत्यु भएको छ भने पाँचजना घाइते भएका छन् । दुर्घटनामा अमरबहादुर सुनारको मृत्यु भएको प्रहरीले जनाएको छ । त्रिशुलीबाट तरकारी लिएर काठमाडौं आउँदै गरेको बा‌ ५ च ३६०६ नम्बरको टाटा मोबाईल गाडी दुर्घटना भएको हो ।

त्यस्तै गएराति नवलपरासीमा भएका दुई छुट्टाछुट्टै दुर्घटनामा एकजनाको मृत्यु भएको छ भने दुई जना गम्भीर घाइते भएका छन् । नारायणघाटबाट बुटवल जाँदै गरेको बा १ ख ६९९२ को बसले मुकुन्दपुर गाविस वडा नक्बर ६ को भेडावारीमा ३५ वर्षीय शशिधर विकलाई ठक्कर दिँदा उनको घटनास्थलमै मृत्यु भएको हो । बसचालक ऋषिराम चौधरीलाई इलाका प्रहरी कार्यालय नवलपुरले नियन्त्रणमा लिएको छ ।

त्यसैगरी बुटवलबाट नारायणघाट आउँदै गरेको लु १ च १३६१ नम्बरको जिपले नवलपरासीको रजहरमा बा १८ प १०१० नम्बरको मोटरसाइकललाई ठक्कर दिँदा रजहरका देवबहादुर थापा र गोविन्द गैरे घाइते भएका छन् भने उनीहरुको भरतपुर अस्पतालमा उपचार भइरहेको छ ।