आयो नयाँ चुनाव प्रचार शैली

by raju Wed Mar 5, 2008 1:50 pm NST

संविधानसभा चुनावको मिति नजिकिँदै आएपछि दलहरु औपचारिक रुपमै चुनावी प्रचारमा होमिएका छन् । आ-आफ्ना पार्टीका उम्मेद्वार लिएर घरदैलोमा हिँड्न सुरु गरेका दलहरुले चुनाव प्रचारको पनि नयाँ-नयाँ शैली अपनाउन थालेका छन् ।

यसै क्रममा नेकपा माओवादीले काठमाडौंमा चुनाव प्रचारको नयाँ शैली अपनाएको छ । माओवादीले आज बिहान काठमाडौकों क्षेत्र नम्बर एक अन्तर्गत अनामनगर क्षेत्रमा पंचेबाजा र नाचगानसहित आफ्ना उम्मेदवारलाई अघि लगाएर घरदैलो अभियान चलाएको थियो ।

तराई समस्याको समाधानसँगै जिल्ला-जिल्लामा पनि दलहरु चुनावी कार्यक्रममा जुटेका छन् । यसै क्रममा लमजुङमा दलहरु चुनावी प्रचार अभियान लिएर गाउँगाउँ जाने भएका छन् । नेकपा एमालेले लोकतान्त्रिक गणतन्त्रका पक्षधरलाई जिताउन आह्वान गर्दै लमजुङका घर-घरमा निम्तो कार्ड पठाउने भएको छ ।

त्यसैगरी नेपाली कांग्रेसले एक हजार सात सय ३० जनाको चुनाव प्रचार प्रसार समिति गठन गरेको छ । कांग्रेसले सम्पूर्ण शक्ति चुनावमा केन्द्रित गर्ने निर्णय गरेको छ । त्यस्तै माओवादी पनि उम्मेदवारसहित जनमुखी गणतन्त्र विजयी अभियान लिएर गाउँगाउँमा पुगेको छ । जनमोर्चा नेपालले पनि चुनावी प्रचार प्रसारका लागि गाउँगाउँ जाने निर्णय गरेको छ । पाल्पामा पनि दलका नेताहरु चुनावी प्रचारमा गाउँ गाउँ पुगेका छन् । यसैबीच पाल्पामा निर्वाचन आयोगले दलहरुलाई सार्वजनिक स्थानमा लेखिएका भित्तेलेखन तत्काल मेट्न र तुल ब्यानर हटाउन आग्रह गरेको छ । आयोगले चुनाबी मैदानमा उत्रिएका सबै दललाई बोलाएर आचारसंहिता पालना गर्न अनुरोध गर्दै भित्तेलेखन तत्काल नमेटे आफै मेट्ने र त्यसको बिल सम्बन्धित दलबाटै भराउने निर्णय गरेको छ ।

त्यस्तै महिला तथा बाल उत्थान मंच मकवानपुरले चुनावका लागि नागरिकलाई सचेत पार्ने उद्देश्यले गाउँगाउँमा सचेतना कार्यक्रम साचालन गरेको छ । कारितास नेपालको आर्थिक सहयोगमा मकवानपुरको हाँडीखोला हर्नामाडी मनहरी बसामाडी र हटिया गाविसमा संविधान सभा सम्बन्धी पुनर्ताजगी तालिम अभियान थालिएको छ ।