महाशिवरात्रीमा बाबाहरुको चहलपहल

by raju Wed Mar 5, 2008 1:48 pm NST

महाशिवरात्री पर्व नजिकिँदै गर्दा अहिले काठमाडौंमा शिवभक्त बाबाहरुको चहलपहल पनि बढेको छ । पशुपति क्षेत्र विकास कोषले महाशिवरात्री पर्वमा १० हजार साधु सन्त र नांगाबाबा आउने र १० लाख भक्तजनले दर्शन गर्ने अनुमान गरेको छ ।

पर्यटन मन्त्रालयले शिवरात्रीलाई व्यवस्थित गर्न पर्यटनमन्त्री पृथ्वी सुब्वा गुरुङको अध्यक्षतामा एक हजार एक सदस्यीय मूल समारोह समिति गठन गरेको छ । त्यसैगरी विभिन्न उपसमिति पनि गठन गरिएका छन् । कोषले हिजो काठमाडौंमा पत्रकार सम्मेलन गरी भक्तजनलाई निःशुल्क भोजनको समेत व्यवस्था गरिएको जानकारी गराएको छ । कोषले मन्दिर क्षेत्रमा क्यामेरा टेपरेकर्डर र मोवाइल फोन लान रोक लगाएको छ ।

शिवरात्रीमा भक्तजनको सुरक्षा जनपथ र सशस्त्र प्रहरीले गर्ने भएका छन् भने दर्शनार्थीको सुरक्षा र सुविधाका लागि आवासस्थल र दर्शनमार्गमा सुरक्षा पोष्ट पनि राखिने भएको छ । त्यसैगरी यातायात व्यवस्थापनको जिम्मा महानगरीय ट्राफिक प्रहरी कार्यालयले लिएको छ । पर्व अवधिभर नेपाल स्काउट तथा विभिन्न स्वयमसेवी संघसंस्था पनि परिचालित हुने बताइएको छ ।