लमजुङको टाप गाउँमा विजुली

by raju Tue Jan 22, 2008 2:44 pm NST

लमजुङको सदरमुकाम बेसीशहरवाट १ दिन पैदल हिंडेर पुगिने टापगाउँमा विजुली बलेपछि स्थानीयवासिन्दा निकै खुसी भएका छन् । लघु जलविद्युत आयोजनाले गाउँका ८० घरपरिवारलाई विजुलीको ब्यवस्था गरिदिएको छ ।

बन्सार गाउँ विकास समिति वडा नं ८ र ९ अन्तर्गत टाप गाउँमा विजुली बाल्नका लागि कादुरी परियोजनाले ३६ लाख ३४ हजार रुपैंया सहयोग गरेको थियो । यो परियोजना पुरा गर्नका लागि स्थानीय वासिन्दाले २ लाख ५० हजार बराबरको जनश्रमदान गरेका थिए । यो जलविद्युत आयोजना कार्तिक १५ गतेवाट शुरु भएको थियो ।

टाप गाउँमा विजुली वलेपछि सधैं टुकी बालेर चुलो चौकामा बस्न बाध्य महिलाहरुलाई पनि सजिलो भएको छ । १० किलोवाट क्षमताको टाप लघु जलविद्युत आयोजनाका प्रायोजक क्याप्टेन मनजङ्ग गुरुङले उपभोक्ता समूहलाई हस्तान्तरण गर्नुभएको छ । लमजुङ जिल्लाको अति बिकट मानिने टाप गाउँमा बिजुली निकाल्ने काम अत्यन्तै चुनौतिपूर्ण भएको परियोजना प्रबन्धक गमबहादुर गुरुङले बताउनुभयो । टापगाउँमा विजुली बाल्नका लागि तम्लिस्यो खोलावाट पाईप विछ्याईएको छ । बिजुली निकाल्न १ किलोमीटर लामो पाइप लाइन बिछ्याइएको छ । यो बिद्युत गृह टापगाउँ देखि १ किलोमीटर पर निर्माण गरिएको छ । गाउँमा विजुली आउनु स्थानीय बासिन्दाका लागि हर्षको बिषय बनेको छ । यो खुसियालीमा कालिका आमा समूह र छौंदी हिमालयन युवा क्लबले दुई दिन र दुईरात नाचगान गरे । गाउमा विजुली ल्याइदिने टाप लघु जलविद्युत आयोजनाका प्राविधिकहरुलाई समेत स्थानीय बासिन्दाले सम्मान गरेका थिए ।